طبيب سوري يطالب بوعد لإكمال المشوار لو استشهد في المظاهرات

شباب و صبايا أخوتي من أبي الشعب السوري البطل و أمي سوريا هي لحظة فضفضة و جوزين كلام أول شي أنا بعمري ما درست سياسة و لا بعرف مين البروليتاريا و شو معنى الأوتوقراطية أنا طبيب و اللي حولني لمندس وضع المرضى و المشافي و الأطباء و التمريض .....

أنا كاتب كتابي و لسا ما تجوزت "مأجلها" بلكي عرّس بميدان التحرير
أنا طالع بكرا .... وحامل روحي عكفي ووالله بترخص كرمال ماما سوريا اللي لأول مرة بحس انها الي ملكي و بفتخر أني سوري بدون لاحقة مؤذية للسمع بعدها

أنا يمكن استشهد أو انتصر و بالحالتين انا ربحان...
رسالتي لأمي رضاكي يا حجة و دعاكي يا أمي و بعرف الله بيستجيبلك
رسالتي لأبي بابا بيجوز شوفك قريب و انشالله كونلك و ل69 من أهلي شفيع
رسالتي لحبيبتي بحبك و الله بحبك ....بحبك قد سوريا و يا رب ينصرنا مشان ابننا ما يشوف اللي شفناه يا "صغيرتي"
رسالتي لرجال الأمن بحبكم لأنكم سوريين و هي لحالها بتكبركم بعيوني و معلش بيجيكم يوم و بتفهموا اني عم اعمل هيك مشان رجعلكم سورية الكم كمان
شباب و صبايا بحبكم بحروفكم قريت الأمل بكلماتكم حسيت بالنصر ازا استشهدت وعدوني تكملوا و لا توقفوا لحد ما تخلصوا بناء ...بوصيكم بأهلي و هنن كل أب و أم شهيد و بحبيبتي ...لا تضيعوا دمي هدر بس كلي ثقة فيكم و بعرفكم ابطال لا تألهوا حدا بسوريا مين من كان مين من كان ابنوا سوريا تشرف كل واحد بانتماءنا الها لا تظلموا و اقطعوا ايد الظالم لا تسجنوا غير المجرمين بالسجون ....و المشافي ببوس ايدكم المشافي..باختصار بوصيكم بأبونا الشعب السوري كلّه و ركزوا "كله" ...و بأمنا سوريا
اما اذا اعتقلوني فلا توقفوا لأطلع أنا و كل أخواتكم و أخواتكن ..
حاترك النت هلأ لصلي و يمكن نام "مع اني أشك" و موعدنا بكرا بعد صلاة الجمعة و بعدا عالنت بكرا
الله سوريا حرية و بس أخوكم د.جهاد